Министерството за култура и туризам го отвори новиот Конкурс за финансирање проекти за развој на креативните индустрии. Ова е еден од чекорите за обезбедување стабилен и одржлив развој на креативните индустрии, а средствата ќе бидат насочени за проекти за создавање или подобрување на културни активности кои се значајни за заедницата и збогатување на локалната културна сцена преку иновативни и креативни решенија.
„Со Конкурсот што денеска го објавивме, ќе обезбедиме финансиска поддршка за проекти кои ќе го стимулираат развојот на креативните индустрии, создавајќи нови можности за претприемачите, младите уметници и креативни тимови. Тоа ќе поттикне нови вработувања, зголемување на конкурентноста на нашите креативни индустрии на глобалниот пазар и развивање на културниот туризам“, рече Љутков.
Тој потсети дека во периодот од 2013 до 2017 година, Министерството за култура објави пет годишни конкурси за финансирање проекти од областа на креативните индустрии, при што финансиски беа поддржани околу 270 проекти.
Моја заложба е да продолжиме да вложуваме во поддршката на иновациите, креативноста и уметничките изрази, како и да создаваме платформи за нови генерации уметници, дизајнери, продуценти и за сите други креативни професионалци.
Тој ги повика креативците и организациите да се пријават и да ја искористат можноста за реализација на своите идеи и проекти.
„Нашето општество има огромен потенцијал и заедно можеме да придонесеме за подобрување на културниот, економскиот и туристичкиот напредок што ни е потребен. Министерството за култура и туризам ќе продолжи да работи на поддршка на проекти што ја афирмираат културата и создаваат нови вредности во општеството“, рече Љутков.
Конкурсот за финансирање проекти за развој на креативните индустрии е објавен на веб-страницата на Министерството.
